ललितपुर । मितेरी सहकारी संस्थाको रकम हिनामिना प्रकरणमा मुछिएर विवादमा तानिएकी नेपाली कांग्रेसका नेता धनराज गुरुङकी पूर्वपत्नी ज्योती गुरुङविरुद्ध ललितपुर जिल्ला अदालतले २१ दिने म्याद सूचना (इतलायनामा) जारी गरेको छ।

अदालतले बोध विक्रम थापाद्वारा दायर गरिएको लेनदेन मुद्दामा (मुद्दा नं. ०८२-CP-०१९३) उनलाई सबुत प्रमाणसहित प्रतिउत्तर पेस गर्न आदेश दिएको हो। यसअघि जारी भएको म्याद बदर भएपछि अदालतले गत जेठ ५ गतेको आदेशअनुसार मुलुकी देवानी कार्यविधि संहिता, २०७४ को दफा १०५ को उपदफा (२२) बमोजिम यो सार्वजनिक सूचना जारी गरेको जनाएको छ।

को हुन् ज्योती गुरुङ ?

अदालतको म्याद सूचना र प्राप्त विवरणअनुसार ४८ वर्षीया ज्योती गुरुङ कांग्रेस नेता धनराज गुरुङकी पूर्वपत्नी हुन्। स्याङ्जा जिल्ला, साविक अर्जुनचौपारी गा.वि.स. वडा नं. ७ (हाल अर्जुनचौपारी गाउँपालिका वडा नं. २, लामडाँडा) स्थायी घर भएकी उनी हाल ललितपुर महानगरपालिका–१४, थसिखेलमा बस्दै आएकी छन्। अदालतको सूचनामा उनी हस्तबहादुर गुरुङकी नातिनी र हित बहादुर गुरुङकी छोरी भएको खुलाइएको छ भने श्रीमानको नाम धनराज गुरुङ नै उल्लेख छ।

सहकारीको करोडौं रकम अपचलनको आरोप लागेपछि उनी पछिल्लो समय चर्चा र छानबिनको घेरामा तानिएकी थिइन्। सहकारी प्रकरणकै बीचमा लेनदेनको अर्को मुद्दामा अदालतले उनीविरुद्ध म्याद जारी गरेको हो।

अदालतको चेतावनी: २१ दिनभित्र उपस्थित नभए कानुनबमोजिम हुने

ललितपुर जिल्ला अदालतले २०८३ साल जेठ ११ गते जारी गरेको सूचनामा पत्रिकामा सूचना प्रकाशित भएको मितिले बाटोको म्यादबाहेक २१ दिनभित्र अदालतमा हाजिर हुन भनिएको छ।

ज्योतीले आफू स्वयं वा कानुनबमोजिमको प्रतिनिधिमार्फत आफ्नो सबुद प्रमाणसहितको प्रतिउत्तर पत्र लिएर अदालतमा उपस्थित हुनुपर्नेछ। तोकिएको म्यादभित्र उपस्थित नभई म्याद गुजारेको खण्डमा मुद्दा कानुनबमोजिम अघि बढ्ने र पछि कुनै उजुरबाजुर नलाग्ने चेतावनी अदालतले दिएको छ।