काठमाडौँ । अन्तर्राष्ट्रिय बजारमा कच्चा तेलको मूल्यमा गिरावट आएको छ। अमेरिका र इरानबीच अस्थायी समझदारी बनेको खबर सार्वजनिक भएपछि आपूर्ति जोखिम कम हुने अपेक्षाले तेल बजारमा दबाब बढेको हो।

बिहीबार ब्रेन्ट क्रुडको मूल्य करिब १.६६ प्रतिशतले घटेर प्रतिब्यारेल ७८ डलरको हाराहारीमा पुगेको छ। त्यस्तै, डब्लूटीआई (WTI) क्रुड पनि झन्डै १.९० प्रतिशतले घट्दै ७५ डलर नजिक कारोबार भइरहेको छ।

बजार विश्लेषकहरूका अनुसार इरानबाट पुनः ठूलो परिमाणमा कच्चा तेल निर्यात हुन सक्ने सम्भावनाले विश्व बजारमा आपूर्ति बढ्ने संकेत देखिएको छ। यही अपेक्षाले मूल्यमा गिरावट आएको बताइएको छ।

प्रारम्भिक समझदारीअनुसार अमेरिका र इरानबीच आगामी ६० दिनसम्म वार्ता जारी रहनेछ। वार्ताको मुख्य केन्द्रबिन्दु रणनीतिक जलमार्ग स्ट्रेट अफ हर्मुजलाई पूर्ण रूपमा सञ्चालनमा ल्याउने विषय रहने जनाइएको छ।

यस्तै, इरानमाथि लगाइएका केही प्रतिबन्धहरू आंशिक रूपमा खुकुलो हुन सक्ने अनुमानले पनि बजारमा थप आपूर्ति आउने अपेक्षा बढाएको छ। विश्लेषकहरूका अनुसार यदि सहमति प्रभावकारी रूपमा कार्यान्वयन भयो भने आगामी दिनमा कच्चा तेलको मूल्यमा थप दबाब पर्न सक्नेछ।