काठमाडौं । ब्राजिलको रियो दि जेनेरियोमा आइतबार बिहान दुई हेलिकोप्टर आकाशमै एक–आपसमा ठोक्किएर दुर्घटनाग्रस्त हुँदा ६ जनाको ज्यान गएको छ। दुर्घटनापछि दुवै हेलिकोप्टर सहरको पश्चिमी क्षेत्रमा रहेको एक इलेक्ट्रिक गाडी डिलरसिपको पार्किङ क्षेत्रमा खसेका थिए।

ठक्करलगत्तै हेलिकोप्टरमा आगलागी भएको र आगो पार्किङमा रहेका गाडीहरूमा समेत फैलिएको दमकल विभागले जनाएको छ। आगलागीका कारण करिब २० वटा इलेक्ट्रिक गाडी पूर्ण रूपमा नष्ट भएका छन्।

प्रहरीका अनुसार नागरिक उड्डयन प्राधिकरणलाई बुझाइएको यात्रु सूचीमा अमेरिकी गायक तथा कमेडियन Oliver Tree को नाम पनि समावेश थियो। तर दुर्घटनामा मृत्यु भएका व्यक्तिहरूको औपचारिक पहिचान अझै हुन नसकेको अधिकारीहरूले बताएका छन्।

ट्रीले जुन ४ मा अर्जेन्टिनामा सांगीतिक प्रस्तुति दिएका थिए भने शनिबार मात्रै उनले सामाजिक सञ्जालमा ब्राजिलको एक बस्तीमा फुटबल खेलिरहेको भिडियो सार्वजनिक गरेका थिए।

स्थानीय सञ्चारमाध्यमका अनुसार एउटा हेलिकोप्टर जमिनमा खस्नेबित्तिकै ठूलो विस्फोट भएको थियो, जसले आसपास पार्क गरिएका गाडीहरूमा आगो फैलाएको थियो।

दमकल तथा उद्धारकर्मीहरूले करिब एक घण्टाको प्रयासपछि आगो नियन्त्रणमा लिएका थिए। प्रारम्भिक जानकारीअनुसार ज्यान गुमाउने सबै दुवै हेलिकोप्टरका चालक दलका सदस्य रहेको बताइएको छ।

दुई हेलिकोप्टर आकाशमै कसरी ठोक्किए भन्ने विषय अझै खुल्न नसकेको र सम्बन्धित निकायले घटनाबारे विस्तृत अनुसन्धान अघि बढाएको जनाएको छ। (एपी)