धनकुटामा भारतीय दर्ताको सवारी साधनमा अवैध रूपमा नेपाली नम्बर प्लेट प्रयोग गरी सञ्चालन गरेको आरोपमा एक युवक पक्राउ परेका छन्।

पक्राउ पर्नेमा भारतको बिहार राज्य, जोगबनी थाना अन्तर्गत अमोना पञ्चायत–२१ मिरगञ्ज निवासी २२ वर्षीय नन्दुकुमार चौधरी रहेका छन्। उनलाई धनकुटाको साँगुरीगढी गाउँपालिका–६ भेडेटारस्थित कोशी लोकमार्गमा सवारी चेकजाँचका क्रममा नियन्त्रणमा लिइएको हो।

इलाका प्रहरी कार्यालय भेडेटारबाट खटिएको टोलीले धरानतर्फ जाँदै गरेका सवारी साधनहरूको नियमित जाँच गर्ने क्रममा चौधरीले चलाइरहेको सेतो रंगको कारमाथि शंका गरी परीक्षण गरेको थियो। जाँचका क्रममा उक्त कारको वास्तविक भारतीय नम्बर BR AG 6702 रहेको खुलेको प्रहरीले जनाएको छ।

तर, सो भारतीय नम्बर प्लेटमाथि प्रदेश १–०१–००१ च ९२९४ नम्बरको नेपाली प्लेट राखेर सवारी सञ्चालन गरिएको भेटिएपछि चालकलाई नियन्त्रणमा लिइएको धनकुटा प्रहरीका प्रवक्ता प्रहरी नायब उपरीक्षक हेमन्त भण्डारी क्षेत्रीले जानकारी दिए।

प्रहरीले चालक र सवारी साधनलाई नियन्त्रणमा लिएर आवश्यक अनुसन्धान तथा कानुनी कारबाहीका लागि यातायात व्यवस्था सेवा कार्यालय, धनकुटामा पठाएको छ। घटना सम्बन्धी कारबाही यातायात व्यवस्था ऐन, २०४९ अनुसार अघि बढाइएको प्रहरीले जनाएको छ।