काठमाडौं- लगातार ओरालो लाग्दै आएको सुनको मूल्यमा बिहीबार एकैदिन ठूलो गिरावट आएको छ। नेपाली बजारमा सुन एकैदिन तोलामा ५ हजार ५०० रुपैयाँले घटेको हो।

नेपाल सुनचाँदी व्यवसायी महासंघका अनुसार बिहीबार छापावाल सुनको मूल्य प्रतितोला २ लाख ८५ हजार रुपैयाँ कायम भएको छ। यसअघि बुधबार सुन प्रतितोला २ लाख ९० हजार ५०० रुपैयाँमा कारोबार भएको थियो।

केही समयअघि प्रतितोला ३ लाख ४० हजार रुपैयाँसम्म पुगेर उच्च रेकर्ड कायम गरेको सुनको भाउ पछिल्लो समय भने निरन्तर घट्दो क्रममा छ। लगातारको गिरावटसँगै सुन अहिले २ लाख ८५ हजारको बिन्दुमा झरेको हो। सुनको भाउ घट्दा बजारमा खरिदकर्तालाई भने केही राहत मिलेको छ।

सुनसँगै चाँदीको भाउ पनि ओरालो लागेको छ। महासंघका अनुसार बिहीबार चाँदी प्रतितोला ४ हजार ८६५ रुपैयाँमा कारोबार भइरहेको छ। अघिल्लो दिनको तुलनामा चाँदीको मूल्य तोलामा २१५ रुपैयाँले घटेको हो।