कतारको रस लाफान औद्योगिक क्षेत्रस्थित ग्यास उत्पादन केन्द्रमा आइतबार भएको भीषण विष्फोटमा नेपालीसहित विभिन्न देशका नागरिक घाइते भएका छन्।

घटनामा १२ भारतीय र एक पाकिस्तानी नागरिकको मृत्यु भएको छ भने ६६ भन्दा बढी व्यक्ति घाइते भएको कतारी अधिकारीहरूले जनाएका छन्।

कतारका ऊर्जा मन्त्री Saad Al-Kaabi का अनुसार घाइतेहरूमा नेपाली, भारतीय, पाकिस्तानी, बंगलादेशी, केन्याली, घानाली, तान्जानियाली र नाइजेरियाली नागरिक रहेका छन्। यद्यपि घाइतेहरूको नामावली भने हालसम्म सार्वजनिक गरिएको छैन।

कतार सरकारले उक्त घटनालाई आक्रमण नभई औद्योगिक दुर्घटना भएको स्पष्ट पारेको छ। विष्फोटपछि लागेको आगो नियन्त्रणमा आइसकेको र ग्यास निर्यात तथा स्थानीय आपूर्तिमा कुनै असर नपर्ने सम्बन्धित अधिकारीहरूले बताएका छन्।

प्रहरी तथा सम्बन्धित निकायले घटनाको कारणबारे थप अनुसन्धान गरिरहेका छन्।