काठमाडौं । प्रतिनिधिसभामा आर्थिक वर्ष २०८३/८४ को विनियोजन विधेयकमाथि मन्त्रालयगत छलफल आगामी असार १ र २ गते सञ्चालन हुने भएको छ। छलफलका क्रममा सांसदहरूले उठाएका प्रश्नको जवाफ सम्बन्धित मन्त्रीहरूले असार ३ र ४ गते दिने कार्यतालिका तय गरिएको छ।

सङ्घीय संसद् सचिवालयका अनुसार असार १ गते युवा, श्रम तथा रोजगार; उद्योग, वाणिज्य तथा आपूर्ति; कृषि, वन तथा वातावरण; सूचना तथा सञ्चार; संस्कृति, पर्यटन तथा नागरिक उड्डयन; शिक्षा तथा खेलकुद; स्वास्थ्य तथा खाद्य स्वच्छता; भूमि व्यवस्था तथा सहकारी; सङ्घीय मामिला तथा सामान्य प्रशासन; तथा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयका विनियोजन शीर्षकमाथि छलफल हुनेछ।

यस्तै असार २ गते विज्ञान, प्रविधि तथा नवप्रवर्तन; कानुन, न्याय तथा संसदीय मामिला; पूर्वाधार विकास; गृह; ऊर्जा, जलस्रोत तथा सिँचाइ; परराष्ट्र; अर्थ तथा रक्षा मन्त्रालयका साथै प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय, उपराष्ट्रपति कार्यालय र राष्ट्रपतिको कार्यालयसँग सम्बन्धित विनियोजन शीर्षकमा छलफल हुने कार्यक्रम छ।

छलफलपछि असार ३ गते पहिलो दिनमा छलफल भएका मन्त्रालयहरूसम्बन्धी प्रश्नको जवाफ सम्बन्धित मन्त्रीहरूले दिनेछन्। त्यसैगरी असार ४ गते दोस्रो दिनका मन्त्रालय तथा निकायहरूमाथि उठेका जिज्ञासाको सम्बोधन सम्बन्धित मन्त्रीहरूले गर्नेछन्।

उल्लेखनीय छ, सरकारले जेठ १५ गते आर्थिक वर्ष २०८३/८४ का लागि राजस्व र व्ययको वार्षिक अनुमान (बजेट) संसद्मा प्रस्तुत गरेको थियो। बजेटमाथिको सामान्य छलफल प्रतिनिधिसभामा यसअघि नै सम्पन्न भइसकेको छ भने अर्थमन्त्री डा. स्वर्णिम वाग्लेले त्यस क्रममा उठेका प्रश्नको जवाफ पनि दिइसकेका छन्।