काठमाडौँको कालीमाटीस्थित रुद्रबिनायक सहकारी संस्थामा रकम अपचलन भएको आरोपमा प्रहरीले संस्थाकी अध्यक्ष र कोषाध्यक्षलाई पक्राउ गरेको छ।

पक्राउ पर्नेमा ४० वर्षीया अध्यक्ष शिला श्रेष्ठ र ३५ वर्षीया कोषाध्यक्ष खिलमाया रिजाल रहेका छन्। उनीहरूमाथि सहकारीको करिब ९२ लाख रुपैयाँ हिनामिना गरेको आरोप लगाइएको प्रहरीले जनाएको छ।

जिल्ला प्रहरी परिसर काठमाडौँका एसपी पवन भट्टराईका अनुसार बचतकर्ताहरूले दिएको उजुरीका आधारमा सोमबार दुवै जनालाई नियन्त्रणमा लिइएको हो। हाल उनीहरूलाई प्रहरी वृत्त कालीमाटीको हिरासतमा राखेर थप अनुसन्धान भइरहेको छ।

प्रहरीले सहकारीमा जम्मा गरिएको बचतकर्ताको रकमको अवस्थाबारे पनि विस्तृत अनुसन्धान अघि बढाएको जनाएको छ।