राष्ट्रिय स्वतन्त्र पार्टी (रास्वपा) का सभापति रवि लामिछानेले नेपाल–भारत सम्बन्धलाई परम्परागत राजनीतिक बहसभन्दा माथि उठाएर विकास, समृद्धि र आर्थिक सहकार्यमा केन्द्रित गर्नुपर्ने बताएका छन्।

भारतीय दैनिक हिन्दुस्तान टाइम्समा प्रकाशित आफ्नो लेखमा लामिछानेले नेपालमा शान्तिपूर्ण र लोकतान्त्रिक प्रक्रियामार्फत नयाँ राजनीतिक अध्यायको सुरुवात भएको उल्लेख गर्दै त्यसलाई ‘मतपेटिकाको क्रान्ति’को संज्ञा दिएका छन्। उनले रास्वपाको उदयलाई नेपालको बदलिँदो राजनीतिक वास्तविकताको संकेतका रूपमा व्याख्या गरेका छन्।

‘गैर–परम्परागत पृष्ठभूमिबाट आएका व्यक्तिहरूले स्थापना गरेको राजनीतिक दलले छोटो समयमै राष्ट्रिय राजनीतिमा प्रभावशाली उपस्थिति बनाउनु कुनै सामान्य घटना होइन,’ उनले लेखमा उल्लेख गरेका छन्। नेपालमा भइरहेको राजनीतिक परिवर्तन र देशको भावी दिशाबारे अन्तर्राष्ट्रिय समुदायको चासो बढ्नु स्वाभाविक रहेको उनको भनाइ छ।

लामिछानेले नेपाल र भारतबीचको सम्बन्धलाई केवल इतिहास, संस्कृति र धार्मिक निकटतामा सीमित नराखी आर्थिक विकास, पूर्वाधार निर्माण, ऊर्जा, प्रविधि तथा व्यापारिक साझेदारीमार्फत थप सुदृढ बनाउनुपर्ने धारणा व्यक्त गरेका छन्।

उनले द्विपक्षीय सम्बन्धमा देखिने विवाद र संवेदनशील विषयहरूलाई उग्र राष्ट्रवादभन्दा तथ्य, संवाद र कूटनीतिक समझदारीका आधारमा समाधान गर्नुपर्नेमा जोड दिएका छन्। स्थिर, समृद्ध र आर्थिक रूपमा सबल नेपाल भारतको उत्तरी सीमाको सुरक्षा तथा क्षेत्रीय स्थायित्वका लागि समेत महत्वपूर्ण हुने उनको तर्क छ।

लेखमा लामिछानेले सन् २०२६ लाई नेपाल–भारत सम्बन्धलाई नयाँ उचाइमा पुर्‍याउने अवसरका रूपमा चित्रण गरेका छन्। उनले साझा हित, आर्थिक समृद्धि र आपसी विश्वासलाई केन्द्रमा राखेर दुवै देशले सहकार्यलाई नयाँ चरणमा लैजानुपर्ने बताएका छन्।

साथै, उनले सन् २०१४ मा भारतीय प्रधानमन्त्री नरेन्द्र मोदीले नेपालको संसदमा गरेको सम्बोधन स्मरण गर्दै दुई देशबीचको विश्वास, सहकार्य र साझेदारीलाई पुनः मजबुत बनाउने समय आएको उल्लेख गरेका छन्।