प्युठान जिल्लाका स्थानीय तहहरूमा आर्थिक वर्ष २०८१/०८२ मा कुल ७ करोड ७३ लाख १८ हजार रुपैयाँभन्दा बढी बेरुजु देखिएको छ। महालेखा परीक्षकको ६३ औँ वार्षिक प्रतिवेदनअनुसार जिल्लाका ९ स्थानीय तहमा विभिन्न शीर्षकमा उक्त बेरुजु कायम भएको हो।

प्रतिवेदनअनुसार सबैभन्दा बढी बेरुजु प्युठान नगरपालिकामा रहेको छ। नगरपालिकाको बेरुजु रकम ३ करोड ६७ लाख १५ हजार रुपैयाँ पुगेको छ। त्यसपछि स्वर्गद्वारी नगरपालिकामा १ करोड ३६ लाख ६ हजार रुपैयाँ बेरुजु देखिएको छ।

त्यस्तै, गौमुखी गाउँपालिकामा १ करोड २३ लाख ५४ हजार, मल्लरानी गाउँपालिकामा १ करोड ४ हजार ४६ हजार रुपैयाँ बेरुजु कायम भएको छ। झिमरुक गाउँपालिकामा ६८ लाख ७५ हजार, नौबहिनी गाउँपालिकामा ५६ लाख १० हजार, माण्डवी गाउँपालिकामा ५१ लाख ४२ हजार तथा ऐरावती गाउँपालिकामा ४२ लाख ८० हजार रुपैयाँ बेरुजु रहेको प्रतिवेदनमा उल्लेख छ।

सबैभन्दा कम बेरुजु सरुमारानी गाउँपालिकामा रहेको छ। गाउँपालिकाको बेरुजु रकम २१ लाख ३७ हजार रुपैयाँ रहेको छ।

महालेखा परीक्षकको प्रतिवेदनले स्थानीय तहमा आर्थिक अनुशासन, खर्च व्यवस्थापन तथा पारदर्शितामा अझ सुधार आवश्यक रहेको संकेत गरेको छ।