काठमाडौं– नेपाल र भारतबीचको गहिरो धार्मिक तथा सांस्कृतिक सम्बन्धलाई निरन्तरता दिँदै भारतका केन्द्रीय गृहमन्त्री अमित साहले आराध्यदेव पशुपतिनाथ मन्दिरलाई ४० किलोग्राम विशेष चन्दन पठाएका छन्।

पशुपतिनाथको शिरमा गरिने महत्त्वपूर्ण 'श्रीयन्त्र पूजा'मा प्रयोग गर्नका लागि उक्त चन्दन अर्पण गरिएको हो। सांसद सन्दीप रानाको विशेष पहल र समन्वयमा काठमाडौं ल्याइएको सो चन्दन पशुपतिनाथका मूल अर्चक (भट्ट) गणेश भट्टलाई विधिवत रूपमा हस्तान्तरण गरिएको छ।

मन्दिरमा प्राप्त भएको उक्त बहुमूल्य चन्दनलाई सुरक्षित भण्डारण गर्न मूल भट्टले आजै गुठी संस्थानअन्तर्गतको पशुपति गोश्वारा कार्यालयकी प्रमुख सुशीला शर्मालाई जिम्मा लगाइसकेका छन्।

 पशुपतिनाथप्रतिको अपार आस्थाका कारण भारतबाट हरेक वर्ष विशेष प्रकारको चन्दन पठाउने परम्परा नै बसिसकेको छ। यसै सिलसिलामा अघिल्लो वर्ष पनि भारतको गोवा राज्यका एक मन्त्रीले भगवान् पशुपतिनाथलाई ३५ किलोग्राम चन्दन अर्पण गरेका थिए। दुई देशका नागरिकबीचको जनस्तरको सम्बन्धलाई यस्ता धार्मिक गतिविधिले थप प्रगाढ बनाउँदै लगेको छ।