बुटवल । लुम्बिनी प्रदेश सरकारमा बजेट प्रस्तुतिको तयारी चलिरहेका बेला मन्त्रिपरिषद्मा महत्वपूर्ण फेरबदल सुरु भएको छ। नेकपा एमालेको कोटाबाट सरकारमा रहेका चार मन्त्रीले पदबाट राजीनामा दिएका छन् भने उनीहरूको स्थानमा नयाँ अनुहार ल्याउने तयारी गरिएको छ।

मुख्यमन्त्री चेतनारायण आचार्यका अनुसार पार्टीको निर्णयअनुसार भूमिश्वर ढकाल, दिनेश पन्थी, खेम सारुमगर र सीता शर्मा चौधरीलाई पद छाड्न भनिएको हो। उनले सरकारलाई थप प्रभावकारी बनाउन र नयाँ नेतृत्वलाई अवसर दिन मन्त्री परिवर्तन गरिएको बताए।

केही सातादेखि प्रदेश सरकार पुनर्गठनको चर्चा चल्दै आएको थियो। विशेषगरी नेपाली कांग्रेसले पूर्वसहमति कार्यान्वयन गर्दै मुख्यमन्त्रीसहित सरकारको समग्र पुनर्गठन हुनुपर्ने धारणा राखेपछि मन्त्री हेरफेरको प्रक्रिया तत्काल अघि बढ्न सकेको थिएन।

यद्यपि अहिले एमालेले आफ्नो भागमा रहेका मन्त्रालयमा नयाँ प्रतिनिधि पठाउने निर्णय गरेसँगै मन्त्रिपरिषद् पुनर्गठनको प्रक्रिया अगाडि बढेको हो। बुधबार नै नयाँ मन्त्रीहरू नियुक्त गर्ने तयारी भए पनि प्रदेश प्रमुख कृष्णबहादुर घर्ती मगर प्रदेशबाहिर रहेकाले शपथ कार्यक्रम केही दिन पर सरेको छ। सचिवालयका अनुसार नयाँ मन्त्रीहरूको नियुक्ति र शपथ कम्तीमा दुई दिनपछि हुनेछ।

सरकारले भने मन्त्रिपरिषद्को परिवर्तनले आगामी आर्थिक वर्षको बजेट निर्माण र प्रस्तुतीकरणमा कुनै असर नपर्ने स्पष्ट पारेको छ। बजेट तयारीको काम नियमित रूपमा अघि बढिरहेको जनाइएको छ।

यसबीच प्रदेश सरकारले आगामी साउन १ गतेदेखि मन्त्रालयको संख्या घटाएर आठमा सीमित गर्ने निर्णय समेत गरिसकेको छ। एमाले–कांग्रेसबीच भएको समझदारीअनुसार मन्त्रालयको भागबण्डा भने यथावत् रहने बताइएको छ।

नयाँ मन्त्रीका रूपमा एमालेले गुल्मीका डिल्लीराज भुसाल, अर्घाखाँचीका रामजी घिमिरे, रूपन्देहीका तुलसीप्रसाद चौधरी र बाँकेका रत्न खत्रीलाई अघि सारेको स्रोतले जनाएको छ। रत्न खत्री यसअघि मन्त्रीको जिम्मेवारी सम्हालिसकेका नेता हुन् भने अन्य तीन जनाले पहिलोपटक मन्त्री बन्ने अवसर पाउने सम्भावना छ।

पार्टीले यसपटक लामो समयदेखि अवसरको प्रतीक्षामा रहेका तथा पुनः निर्वाचित प्रदेशसभा सदस्यहरूलाई प्राथमिकता दिएको बताइएको छ।