काठमाडौँ । नेकपा एमालेको केन्द्रीय कार्यालय च्यासलमा शुक्रबार पार्टी कार्यकर्ताबीच हात हालाहालको स्थिति सिर्जना भएको छ । आदिवासी जनजाती लोकतान्त्रिक महासंघका केही सदस्यहरू महाधिवेशन प्रतिनिधि छनोट प्रक्रियाप्रति असन्तुष्टि जनाउँदै च्यासल पुगेका थिए । उनीहरूले संगठन विभाग प्रमुख काशीनाथ अधिकारी र स्थायी कमिटी सदस्य भानुभक्त ढकालसँग भेट गरी आफ्ना गुनासा राखिरहेका बेला अर्को समूहसँग उनीहरूको हात हालाहाल भएको हो ।

एमालेको महाधिवेशन उद्घाटन मंसिर २७ गते भक्तपुरको सल्लाघारीमा हुँदैछ र देशभरबाट प्रतिनिधि छनोट भइसकेका छन् । तर, प्रतिनिधि छनोटमा लोकतान्त्रिक प्रक्रिया नअपनाइएको भन्दै महासंघका असन्तुष्ट नेताहरूले चर्को आवाजमा डेढ वर्षसम्म विधि नमिलेको आरोप लगाएका थिए ।