काठमाडौं । देशका विभिन्न क्षेत्रमा आजदेखि मौसम बदली भई वर्षाको सम्भावना बढेको छ । गएरातिदेखि नै केही स्थानमा पानी परिरहेको छ भने आगामी केही दिनसम्म मौसम प्रणाली सक्रिय रहने मौसमविद्ले बताएका छन् ।

हाल पश्चिमी वायु, स्थानीय वायु तथा नेपालको पूर्वी भूभाग नजिक रहेको न्यूनचापीय क्षेत्रको प्रभावका कारण देशका अधिकांश स्थानमा वर्षा हुने अवस्था बनेको हो ।

जल तथा मौसम विज्ञान विभागका अनुसार आज दिउँसो देशभर सामान्यदेखि पूर्ण बदली रहनेछ । गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा मेघगर्जन र चट्याङसहित मध्यम वर्षाको सम्भावना रहेको छ । साथै मधेस, कोसी र वाग्मती प्रदेशका केही तराई क्षेत्रमा पनि वर्षा हुन सक्ने जनाइएको छ ।

विभागले सुदूरपश्चिम, कर्णाली र लुम्बिनी प्रदेशका केही स्थानमा हावाहुरी चल्न सक्ने चेतावनी दिएको छ । पछिल्ला केही दिनदेखि अत्यधिक गर्मी महसुस भएका क्षेत्रहरूमा पनि वर्षाले मौसम केही शीतल बनाउने अनुमान गरिएको छ ।

रातिको समयमा पनि लुम्बिनी, सुदूरपश्चिम, कर्णाली, गण्डकी, वाग्मती र कोसी प्रदेशका पहाडी तथा हिमाली भूभागमा बदलीसँगै वर्षाको सम्भावना रहने विभागले जनाएको छ । तराईका केही क्षेत्रमा पनि चट्याङसहित पानी पर्न सक्ने सम्भावना छ ।

मौसमविद्हरूका अनुसार सोमबारसम्म यो प्रणाली सक्रिय रहनेछ । पश्चिम नेपालबाट सुरु भएको प्रभाव क्रमशः गण्डकी, कोसी र मधेस प्रदेशसम्म फैलिने अनुमान गरिएको छ । केही स्थानमा भारी वर्षासमेत हुन सक्ने भएकाले सतर्कता अपनाउन आग्रह गरिएको छ