पाेखरा । लामो समयदेखि विवादमा रहेको पोखराको अमरसिंह चोक क्षेत्रका सटर तथा टहराहरू अन्ततः हटाइएका छन् । पोखरा महानगरपालिकाले मङ्गलवार बिहान पृथ्वी राजमार्ग आसपास निर्माण गरिएका ५१ वटा टहरामा डोजर चलाएर संरचना हटाएको हो ।

अतिक्रमण गरेर बनाइएका संरचना हटाइएपछि पोखरा महानगरपालिकाका मेयर धनराज आचार्यले उक्त क्षेत्रको स्थलगत अनुगमन समेत गरेका छन् ।

पोखरा महानगरपालिका वडा नम्बर १० का वडाध्यक्ष सन्तोष बास्तोलाका अनुसार अमरसिंह माध्यमिक विद्यालयको भोगाधिकारभित्र पर्ने उक्त जग्गामा २०३८ सालदेखि टहरा निर्माण गरी व्यावसायिक प्रयोजनका लागि भाडामा दिइँदै आएको थियो । संरचना हटाउने विषयमा लामो समयदेखि प्रयास भइरहे पनि यसपटक व्यवसायी, विद्यालय र वडा कार्यालयबीच भएको समन्वय तथा सहमतिपछि प्रक्रिया अघि बढाइएको उनले बताए ।

डोजर परिचालन गर्नुअघि महानगरपालिकाले सोमवार सर्वपक्षीय बैठक आयोजना गरेको थियो । बैठकमा सुरक्षा निकायका प्रमुख तथा विभिन्न सरोकारवालाको सहभागिता रहेको थियो । सहभागीहरूले राजमार्ग क्षेत्र मिचेर निर्माण गरिएका अनधिकृत संरचनाहरू तत्काल हटाउनुपर्ने धारणा राखेका थिए । सोही निष्कर्ष र सहमतिका आधारमा मङ्गलवार बिहानदेखि डोजर परिचालन गरिएको महानगरले जनाएको छ ।

महानगरले कारबाही अघि बढाउनुअघि नै अधिकांश व्यवसायीहरूले आफ्ना पसल तथा सटर खाली गरिसकेका थिए । केही व्यवसायीहरूले टहरा आफैँ भत्काएर त्यहाँ रहेका सामग्री तथा संरचना सुरक्षित रूपमा अन्यत्र सारेका थिए ।

व्यवसायीहरूको सहयोगपछि अहिले महानगरपालिकाको टोलीले बाँकी भग्नावशेष हटाउने तथा जमिन सम्याउने काम गरिरहेको छ ।