विद्युतीय युगतर्फ तत्काल फड्को सम्भव छैन, पूर्वाधार सुदृढीकरण आवश्यक : प्रधानमन्त्री शाह

विद्युतीय युगतर्फ तत्काल फड्को सम्भव छैन, पूर्वाधार सुदृढीकरण आवश्यक : प्रधानमन्त्री शाह

काठमाडौं — प्रधानमन्त्री वालेन्द्र शाहले हालको विद्युत् पूर्वाधारको सीमित क्षमताका कारण नेपाललाई तत्काल पूर्ण रूपमा विद्युतीय युगमा रूपान्तरण गर्न नसकिने बताएका छन्।

आइतबार प्रतिनिधिसभा बैठकमा सम्बोधन गर्दै उनले देशभर एकैपटक विद्युतीय चुल्हो तथा इन्डक्सन प्रयोग गरी खाना पकाउने अवस्था आएमा विद्यमान ट्रान्सफर्मर र सब-स्टेशनहरूले अतिरिक्त भार धान्न नसक्ने बताए। उनका अनुसार विद्युत् वितरण प्रणालीको क्षमता विस्तार नगरी व्यापक विद्युतीय प्रयोगलाई प्रोत्साहन गर्दा प्राविधिक समस्या उत्पन्न हुन सक्छ।

प्रधानमन्त्री शाहले नेपाल विद्युत् प्राधिकरणको पूर्वाधार विस्तार तथा क्षमता अभिवृद्धिका लागि ठूलो लगानी आवश्यक रहेको उल्लेख गरे। यही उद्देश्यलाई ध्यानमा राख्दै आगामी आर्थिक वर्षको बजेटमार्फत विद्युत् क्षेत्रमा ५ प्रतिशत मूल्य अभिवृद्धि कर (भ्याट) लगाइएको उनको भनाइ थियो।

उनले उक्त करबाट संकलित रकम विद्युत् प्रणालीको स्तरोन्नतिमा खर्च गरिने स्पष्ट पार्दै ट्रान्सफर्मर अपग्रेड, सब-स्टेशन विस्तार तथा विद्युत् प्रसारण र वितरण लाइनका तारहरूको क्षमता वृद्धि गर्नुपर्ने आवश्यकता औंल्याए।

प्रधानमन्त्री शाहले बलियो र भरपर्दो विद्युत् पूर्वाधार निर्माणपछि मात्रै देशलाई दिगो रूपमा विद्युतीय युगतर्फ अघि बढाउन सकिने धारणा व्यक्त गरे।